“Məhkum Qadınlar Rəqəmsal Dünyada” layihəsinin bağlanış mərasimi keçirilib.

📌 Layihə İnnovasiya və Rəqəmsal İnkişaf Agentliyi və İKT LAB-ın dəstəyi, “Cəza çəkmiş qadınların cəmiyyətə qayıdışı” İctimai Birliyi və Ədliyyə Nazirliyinin Penitensiar xidmətinin təşkilatçılığı ilə baş tutub. Təlimlər Ədliyyə Nazirliyinin Penitensiar xidmətinin 4 saylı cəzaçəkmə müəssisəsində keçirilib və iki əsas istiqaməti əhatə edib: ofis proqramları/rəqəmsal bacarıqlar və qrafik dizayn.

İştirakçıların bilik səviyyəsinə uyğun olaraq iki qrupa ayrılan təlimlər ümumilikdə 3-4 ay davam edib. 24 məhkum qadın təlimləri uğurla tamamlayaraq sertifikatlarla təltif olunub, onlardan 2 nəfər isə əlavə olaraq beynəlxalq sertifikat əldə etmək şansı qazanıb.

Layihənin əsas məqsədi azadlıqdan məhrum edilmiş qadınların bilik və bacarıqlarını inkişaf etdirərək, onların özünəinamını gücləndirmək və iş həyatına daha yaxşı inteqrasiya etmələrinə dəstək olmaqdır. Layihənin məzunları əldə etdikləri bacarıqlarla yeni bir başlanğıc edə biləcək və onlara gələcəkdə daha geniş imkanlara sahib olmaq üçün davamlı dəstək göstəriləcək.